- शुक्रबार, ८ साउन, २०८३
काठमाडौँ – चंखेली गाउँपालिका–५ मा मंगलबार राति परेको भीषण असिनापानीपछि आएको लेदोसहितको भेलबाढीले विद्यालय तथा घरगोठमा क्षति पुर्याएको छ ।
स्थानीयका अनुसार गाउँमाथिको भिरालो क्षेत्रबाट आएको भेलले डाँफे आधारभूत विद्यालय बगाएको हो ।
बाढीका कारण केही घरगोठ पुरिनुका साथै भेडाबाख्रा पनि पुरिएको प्रारम्भिक जानकारी आएको छ ।
वडाध्यक्ष हर्कधन तामाङले राति ठूलो असिनापानी परेपछि अचानक भेलबाढी आएको जानकारी दिएका छन् ।
उनका अनुसार हालसम्म मानवीय क्षतिको खबर प्राप्त भएको छैन ।
गाउँपालिका अध्यक्ष प्यारीलाल शाहीले घटनापछि बिहानैदेखि सुरक्षाकर्मी परिचालन गरिएको बताए ।
दुर्गम भूगोल र कठिन बाटोका कारण घटनास्थल पुग्न समय लाग्ने उनले जानकारी दिए ।
स्थानीय तहले प्रभावित क्षेत्रका बासिन्दालाई सतर्क रहन र जोखिमपूर्ण स्थानमा नजान आग्रह गरेको छ ।
अहिले वर्षा रोकिए पनि थप पहिरो र बाढीको जोखिम कायम रहेको जनाइएको छ ।
