- आइतबार, १० साउन, २०८३
काठमाण्डू, २३ चैत– एमालेको विरोध कार्यक्रममा भाग लिन गएपछि आफूलाई डिजिटल यौन हिंसा भएको भन्दै अमिशा पराजुलीले दिएको उजुरीमा प्रहरीले एक जनालाई नियन्त्रणमा लिएको छ ।
२० वर्षीया अमिशालाई फेसबुकमा अश्लिल कमेन्ट गरेको आरोपमा रौतहटको गुजरा नगरपालिका–२ घर भएका २४ वर्षीय अभिषेक चौधरीलाई पक्राउ गरिएको साइबर ब्युरोका एसपी दिलीप कुमार गिरीले जानकारी दिएका छन ।
रौतहटबाट पक्राउ गरेर उनलाई काठमाण्डू ल्याएको पुष्टि गर्दै एसपी गिरीले भने– ‘आइतबार अदालतबाट ५ दिनको म्याद लिएर अनुसन्धान गरिरहेका छौँ ।’ प्रारम्भिक सोधपुछको क्रममा चौधरीले आफूले कमेन्ट गरेको स्वीकार गरेका छन् ।
अमिशालाई यौन हिंसाजन्य कमेन्ट गर्ने अन्य आरोपीहरूको विवरण पनि साइबर ब्युरोले मेटा (फेसबुक)सँग मागेको एसपी गिरीले बताए ।
