मन खिन्न बनाउँदै रेनुले भनिन्ः कामबाट चितवनबासीको मन जितेँ, मत जित्न सकिनँ

काठमाण्डू, २३ फागुन– चितवन–२ बाट पराजित नेपाल कम्युनिष्ट पार्टी (नेकपा) की नेतृ रेनु दाहालले आफूले काममार्फत जिल्लाबासीको मन जितेको भए पनि मन जित्न नसकेको भन्दै खिन्नता प्रकट गरेकी छन् ।

सामाजिक सञ्जालमार्फत उनले आफूलाई पराजित गरेकी राष्ट्रिय स्वतन्त्र पार्टी (रास्वपा) की सोबिता गौतमलाई बधाई तथा कार्यकाल सफलताको शुभकामना दिएकी छन् ।

‘मैले कामद्वारा तपाईंहरुको मन त जितेँ तर मत जित्न सकिनँ । मत जित्ने मा.सोबिता गौतमलाई धेरैधेरै बधाई भन्न चाहान्छु’, रेनुले लेखेकी छन् । उनले ‘आगामी दिनमा कामद्वारा जनतामा खुशीयाली र चितवनको थप विकास र समृद्धिका लागि काम गर्न गौतमलाई भनेकी छन् ।

रेनुले सुनामीको लहडमा पनि आफूलाई विश्वास गरेर मत दिने मतदाताप्रति ऋणि रहेको र उनीहरुको यो गुन कहिल्यै नबिर्सने प्रतिबद्धता व्यक्त गरेकी छन् ।

गौतम ५९ हजार २ सय ७७ मतसहित विजयी हुँदा निकतम प्रतिप्रस्पर्धी दाहालले २० हजार ६ सय १५ मत पाएकी छन् ।