- शनिबार, २७ असार, २०८३
काठमाण्डू, २९ माघ– राष्ट्रिय स्वतन्त्र पार्टी (रास्वपा) सांसद शिशिर खनालले काठमाण्डूको ठमेलमा ड्युटीमा रहेका प्रहरी जवानमाथि कुटपिट गर्ने सरकार नेतृत्वकर्ता एमाले सम्बद्ध विद्यार्थी संगठन अनेरास्ववियुका नेतालाई उन्मुक्ति दिइएको भन्दै आपत्ति जनाएका छन् ।
मंगलबारको प्रतिनिधिसभा बैठकमा बोल्दै उनले सत्ता पक्षका कार्यकर्ता भएकैले प्रहरीले आफ्नै तल्लो तहका कर्मचारी कुटिँदासम्म अनुसन्धानको आँट नगरेको भन्दै आपत्ति जनाए ।
आफूले नेतृत्व गर्ने प्रहरीको समेत सुरक्षा गर्न नसक्ने गृहमन्त्री रमेश लेखकले नैतिकताका आधारमा कुर्सीमा बस्न नमिल्ने उनको भनाइ थियो ।
‘ड्युटीमा रहेका प्रहरी कुट्ने अस्कल क्याम्पसका अनेरास्ववियूका नेतालाई नेपाल प्रहरीले अनुसन्धान पनि गर्ने हिम्मत गरेनछ’, ‘तपाईंहरुको दुई तिहाईको बहुमत छ । आफैंले कमाण्ड गरेको प्रहरीको सुरक्षा दिन नसक्ने गृहमन्त्रीले कुन नैतिकताले कुर्सीमा बस्ने हो हामीलाई जवाप दिनुपर्छ ।’
आफू घटना भएको निर्वाचन क्षेत्र काठमाण्डू ६ बाट निर्वाचित सांसद रहेको भन्दै उनले अमृत साइन्स क्याम्पसका विद्यार्थी उत्तः घटनापछि थप त्रसित रहेको बताए । ‘त्यही क्षेत्रबाट प्रतिनिधित्व गर्ने सांसदका रुपमा मलाई धेरै विद्यार्थीहरुले म्यासेज गर्नुभएको छ । उहाँहरुले लेख्नुभएको म्यासेजमा क्याम्पसमा कक्षा कोठामा सधैं उहाँहरुको दादागिरी चल्थ्यो । तर, अब त पुलिसले पनि आँट नगरपछि कसरी क्याम्पसमा बढ्ने तावारण होला र ? कृपया यसबारेबा बोलिदिुस् न भनेर मलाइ म्यासेज पठउनुभएको छ’, खनालले भने ।
खनालले कहिले नेविसंघका विद्यार्थी भनेर गृहमन्त्रीसँग फोटो देखाएर प्राध्यापक थर्काउन पाइने र कहिले सत्ता टिकाउनुपर्ने बहानामा अखिल समर्थित विद्यार्थीलाई प्रहरीले अनुसन्धान पनि गर्ने आँट नगर्ने भन्दै आपत्ति जनाए । तर, आषिका तामाङजस्तालाई भने अभद्र व्यवहार भनेर १५/१५ दिनसम्म हत्कडी लगाएर डुलाउने काम भएको उनको भनाइ थियो ।
खनालले नेपालमा सत्ता पक्ष समर्थित युवालाई मात्र सुरक्षा रहेको भन्ने सन्देश दिन खोजिएको भन्दै सरकारसँग प्रश्न गरे । ‘नेताहरुले भाषणमा नेपाली युवाहरुले देश छाडेर गए भनेर चिन्तित भएको म सुन्छु । तर एउटा पक्षलाई ‘प्रोटेक्ट’ गरेर दलीय विद्यार्थी संगठनका विद्यार्थीहरुलाई मात्र यो देश सुरक्षित छ भनेर हामीले यो देशका युवाहरुलाई देशमै बस भनेर सन्देश दिइरहेका छौं त ? छातीमा हात राखेर नेताहरुले आज भन्नुपर्छ’, उनले भने ।
नेकपा एमालेको विद्यार्थी संगठन अनेरास्ववियुको स्थायी कमिटी सदस्य कमलराज जोशीसहितको मदिरामत्त समूहले बिहीबार राति दरबारमार्गमा ड्युटीमा खटिएका प्रहरी हवल्दार जगुलाल चौधरी र जवान नगेन्द्रराज बिष्टमाथि कुटपिट गरेको थियो ।
माथिको आदेशमा जोशीमाथि पक्राउ पुर्जी जारी गर्न नसकिएको प्रहरी अधिकारीहरुले बताएका छन् ।
