- बिहीबार, ३२ असार, २०८३
काठमाण्डु, २९ मंसिर– मोरङको धनपालथान गाउँपालिका–३ स्थित उमागौरी कृषि सहकारी संस्थाको रकम अपचलनमा संलग्न आरोपमासंघीय संसद्को सार्वजनिक लेखा समिति सभापति ऋषिकेश पोखरेलकी पत्नी अञ्जला कोइराला सहित २६ जनाविरुद्ध मुद्दा दायर गरिएको छ ।
जिल्ला सरकारी वकिल कार्यालय मोरङले बिहीबार उनीहरुविरुद्ध अदालतमा मुद्दा दायर गरेको हो । लेखा समिति सभापति पोखरेलकी पत्नी कोइरालालाई पनि प्रतिवादी कायम गरिएको जिल्ला प्रहरी कार्यालय मोरङका एक उच्च अधिकृतले जानकारी दिएका छन । असोजमा जाहेरी दर्ता गरेर प्रहरीले धनपालथान–४ घर भएका रोशन राजवंशीलाई पक्राउ गरेको थियो ।
राजवंशी सञ्चालक समिति सदस्य हुन् । सुरुमा १० जना र पछि १६ जनाविरुद्ध पक्राउ अनुमति लिएर अनुसन्धान पुरा गरेर प्रतिवेदन बुझाएको जिल्ला प्रहरी कार्यालय मोरङका डीएसपी बेद प्रकाश जोशीले जानकारी दिएका छन ।
उनले भने, ‘उमागौरीको रकम अपचलनमा संलग्न २६ जनालाई प्रतिवादी कायम गर्नुपर्ने राय दिएर हामीले अनुसन्धान प्रतिवेदन बुझाएका छौँ ।’ प्रहरीको प्रतिवेदनको आधारमा सरकारी वकिलले मुद्दा दायर गरेको हो ।
लेखा समिति सभापति पोखरेल पत्नी अञ्जला उमागौरी पूर्व सञ्चालक हुन् । सहकारी संकटमा परेपछि उनले २०७८ माघ ५ मा राजीनामा दिएको खुलेको छ ।
