- शुक्रबार, १ साउन, २०८३
काठमाण्डु, ४ मंसिर– काँग्रेस नेता डा. शेखर कोइरालाले एमालेले आगामी ७ मंसिरमा राजधानीमा गर्न लागेको जनप्रदर्शनको विरोध गरेका छन् ।
कान्तिपुर टेलिभिजनको कार्यक्रम ‘फायर साइड’ मा रुपेश श्रेष्ठसँग कुरा गर्दै कोइरालाले सरकार नेतृत्वकर्ता सुशासन र विधिको शासनका लागि भन्दै सडक प्रदर्शन गर्ने नभई काम गर्नुपर्ने बताए ।
सडकमा प्रदर्शन गरेर विधिको शासन र सुशासन कायम नहुने भन्दै उनले त्यसका लागि काम गर्नुपर्ने उल्लेख गरे ।
‘सरकारमा भएको पार्टीले सुशासन र विधिको शासन भनेर किन शक्ति प्रदर्शन गर्न लाग्नुभएको हो त्यो मैले बुझ्न सकेको छैन’, कोइरालाले भने, ‘सरकारमा भएको पार्टीले गरेर देखाउनु नि जनसभामा गरेर आफनो शक्ति प्रदर्शन गर्ने होइन । उहाँहरुले के गर्नु खोज्नुभएको हो ? मलाइ भन्नु केही छैन । विधिको शासन र सुशासनका लागि हामी जनप्रदर्शन गर्दैछौं भन्नु चाहिं । सडकमा जनप्रदर्शन गरेर विधि र सुशासन हुँदैन । सरकारले काम गरेर देखाउनुपर्छ ।’
कोइरालाले सरकार गठन गर्नुअघि दुई दलबीच भएको सात बुँदे सहमतिअनुसार सरकार अघि नबढेको बताए ।
संविधान संशोधनमा कुनै तयारी नभएको, आर्थिक सुधारको पक्षमा सरकारका काम केन्द्रित नभएको र दुई दलको बलियो सरकार हुँदा पनि जनतमा आशा जागृत नभएको उनको भनाइ थियो ।
सरकारले गलत काम गर्दा आफूले खबरदारी गरेको उनले उल्लेख गरे ।
