- शुक्रबार, २९ जेठ, २०८३
काठमाण्डु, १ वैशाख– सरकारका मुख्यसचिव लीलामणि पौडेलले बागमतिमा नुहाएका छन् ।
पौडेलले बागमति सरसफाइप्रति जनचेतना अभिवृद्धि गर्ने उद्देश्यले आइतबार बिहान गुहेश्वरी घाटमा नुहाएका हुन् । पौडेलसँगै प्रधानमन्त्री कार्यालयका सचिव कृष्णहरि बाँस्कोटा, साहित्यकार एवम् एमाले नेता मोदनाथ प्रश्रित तथा वरिष्ठ पत्रकार भैरव रिसालसहित ठूलो संख्यामा सर्वसाधारणले समेत बागमतिमा स्नान गरेका थिए ।
केही दिनअघि गरिएको प्राविधिक परीक्षणका क्रममा गुहेश्वरीमा नुहाउने हुने देखाएको थियो । मुख्यसचिव पौडेलले पछिल्लो एक वर्षयता हरेक साताको शनिबार बागमति सरसफाई अभियान सञ्चालन गर्दै आएका छन् ।
पछिल्लो समय पौडेलको अभियानमा राजनीतिककर्मीका साथै पेशाकर्मी, कलाकर्मी, सरकारी कर्मचारी, विद्यार्थी र सर्वसाधारणको उत्साहजनक सहभागिता बढ्दै गएको छ ।
