- शुक्रबार, ८ साउन, २०८३
काठमाण्डू, ८ साउन– पूर्व मन्त्री एमालेका नेता प्रदीप ज्ञवालीले मुलुक अफ्यारो अवस्थामा रहेको दाबी गरेका छन । आज (शुक्रबार) ४८ औँ पुष्पलाल स्मृति दिवसको अवसरमा आयोजित कार्यक्रममा बोल्दै एमाले नेता ज्ञवालीले यस्तो बताएका हुन । उनले जनता सजग नभए संविधानमाथि नै चुनौती सिर्जना भएको पनि बताएका छन ।
एमाले नेता ज्ञवालीले भने, ‘झन्डै ७० वर्षदेखि हामीले हासिल गरेका उपलब्धिहरू धरापमा छन् । हामीले एउटा यस्तो प्रधानमन्त्री पाएका छौँ, जसले फेसबुकमा पोस्ट गर्न सक्नुहुन्छ ।
तर गणतन्त्रको दिवसको दिन गणतन्त्रको शुभकामना भन्न उहाँलाई आउँदैन । खुल्ला मञ्चमा जानुहुन्छ, तर गणतन्त्रको पक्षमा उहाँ बोल्नुहुन्न ।’ संविधान संशोधनको नाममा भइरहेको गतिविधिले मुलुक अप्ठ्यारो अवस्थामा रहेको पनि बताएका छन । उनले भने, ‘शक्ति सन्तुलन एकदमै प्रतिकूल भएको छ ।
संविधान निर्माणमा मुख्य भूमिका खेल्ने तीनवटा पार्टीहरू मिल्दा पनि प्रतिनिधि सभामा हामीले उनीहरूका प्रयत्नहरूलाई रोक्न सक्दैनौँ । एक तिहाइ हाम्रो सङ्ख्या छैन। राष्ट्रिय सभा छ, त्यसले ब्यालेन्स गर्ला, आशा गरौँ ।’ संविधानमा हुने प्रतिकूल संशोधनलाई प्रतिगामी संशोधनलाई रोक्न नसक्ने तहसम्म पुगेको पनि बताएका छन ।
उनले थपे, ‘भूराजनीतिक भुमरीमा मुलुकलाई धकेल्ने अनेकौँ खालका प्रयत्नहरू तारनतार भइरहेका छन्। सैन्य अफिसरहरूको तारन्तारको भ्रमण, फ्रि तिब्बत गतिविधिहरू, दलाइ लामाको जन्मोत्सव सबैलाई थाहा छ।’ उनले प्रधानमन्त्रीले संसद्मा उभिएर आत्मघाती अभिव्यक्ति दिएकाले नेपाल भूराजनीतिक भुमरीमा धकेलिन सक्ने पनि बताएका छन ।
