- शुक्रबार, ५ असार, २०८३
सुर्खेत- चोरी मुद्दामा पक्राउ परेर प्रहरी हिरासतमा रहेका एक युवाको मृत्यु भएको छ ।
मृत्यु हुनेमा वीरेन्द्रनगर नगरपालिका–१० पिपिराका २१ वर्षीय सबीर बक्स रहेका छन् ।
मोबाइल चोरीको आरोपमा पक्राउ परेका उनी जेठ २७ गतेदेखि जिल्ला प्रहरी कार्यालय सुर्खेतको हिरासतमा रहेका थिए ।
जिल्ला प्रहरी कार्यालय सुर्खेतका प्रवक्ता डीएसपी कविन्द्रसिंह बोहराका अनुसार हिरासतमा रहेका क्रममा बक्सको स्वास्थ्यमा समस्या देखिएपछि शनिबार बिहान करिब ४ः३० बजे उपचारका लागि कर्णाली प्रादेशिक अस्पताल, कालागाउँ लगिएको थियो ।
तर, अस्पतालले उनलाई मृत घोषणा गरेको प्रहरीले जनाएको छ ।
प्रहरीका अनुसार बक्सविरुद्ध चोरी मुद्दामा अनुसन्धान जारी रहेको थियो र बुधबार मात्रै अदालतबाट म्याद थप गरी अनुसन्धान भइरहेको थियो ।
मृत्युको कारण खुल्न बाँकी रहेको प्रहरीले जनाएको छ ।
शव परीक्षणका लागि बाँकेबाट फरेन्सिक चिकित्सक आउने तयारी भइरहेको र पोस्टमार्टम प्रतिवेदन आएपछि मात्र मृत्युको वास्तविक कारणबारे थप जानकारी प्राप्त हुने डीएसपी बोहराले बताए ।
