रोपाइँअघि मल आपूर्ति सुनिश्चित गर्न सांसद अमरेश सिंहको सरकारसँग माग

काठमाण्डू, १२ जेठ– सत्ता घटक दल राष्ट्रिय स्वतन्त्र पार्टी (रास्वपा)का सांसद अमरेश कुमार सिंह ले धान रोपाइँको समय नजिकिँदै गर्दा किसानलाई समयमै रासायनिक मल उपलब्ध गराउन सरकारको ध्यानाकर्षण गराएका छन । आज (मंगलबार) बसेको प्रतिनिधि सभाको बैठकमा शून्य समयमा बोल्दै उनले यस्तो बताएका हुन ।

उनले आगामी १० देखि १५ दिनभित्र धान रोपाइँ सुरु हुने भएकाले किसानले मल अभावको समस्या भोग्न नपर्ने व्यवस्था मिलाउन आग्रह गरे। आवश्यक परिमाणमा रासायनिक मल आपूर्ति र वितरण प्रभावकारी बनाउन उनले सरकारसँग माग समेत गरेका छन ।

यसै क्रममा सांसद सिंहले उखु किसानले पाउनुपर्ने भुक्तानीको विषय समेत उठाएका छन । चिनी उद्योगबाट किसानले अझै रकम प्राप्त गर्न नसकेको उल्लेख गर्दै उनले सरकारले उपलब्ध गराउने भनिएको अनुदान तथा भुक्तानीसमेत किसानसम्म नपुगेको पनि बताएका छन ।