सचिवालयको बैठकमा विष्णु पौडेल र योगश भट्टराईले मात्रै ओलीको राजीनामा मागेका हुनः एमाले सचिव बस्नेत

काठमाण्डू, ११ जेठ– पूर्व प्रधानमन्त्री एवं एमाले अध्यक्ष केपी शर्मा ओलीले पार्टीलाई पुरानै अवस्थामा फर्काएर मात्र आफूले नेतृत्वबाट बिदा लिने बताएका छन । आइतबार सम्पन्न पार्टीको सचिवालय बैठकमा आफू जिल्ला–जिल्ला पुगेर पार्टीको जागरण अभियानमा लाग्ने समेत बताएका छन ।

एमाले सचिव महेश बस्नेतका अनुसार ओलीले आफ्नो स्वास्थ्य ९८ प्रतिशत ठिक भएको र अब पार्टीलाई बलियो बनाउन फिल्डमा लाग्ने घोषणा समेत गरेका छन । एमाले सचिव बस्नेतले भने, ‘उहाँले मेरो स्वास्थ्य लगभग ९८ प्रतिशत ठिक भइसकेको छ, अब चाहिँ प्रत्येक जिल्ला–जिल्ला, प्रदेश–प्रदेशमा गएर गएर यो पार्टीको ऊर्जा जगाउँछु र जसरी ममाथि र हाम्रो पार्टीमाथि चौतर्फी आक्रमण गरेर एक्ल्याएर कमजोर बनाइएको छ, अब पार्टीलाई पुरानै अवस्थामा पुर्‍याउने कुरामा मैले नै भूमिका खेल्नु भनेर बढो जोस जाँगर र ऊर्जा दिएर उहाँले यो बैठक सक्नुभयो।’

बस्नेतका अनुसार बैठकमा विष्णु पौडेल र योगेश भट्टराईले मात्र अध्यक्षले राजीनामा दिनुपर्ने विषय उठाएका थिए ।