- शनिबार, २१ असार, २०८२
काठमाण्डू, २० असार– अशोक राई नेतृत्वको सत्तारुढ जनता समाजवादी पार्टीको मधेस प्रदेश अध्यक्ष अशोक यादवविरूद्ध पक्राउ पुर्जी जारी भएको छ ।
अध्यक्ष यादवविरूद्ध आपराधिक उपद्रवको कसुरमा जिल्ला अदालत सर्लाहीबाट शुक्रबार पक्राउ पुर्जी जारी भएको हो ।
यादवले सर्लाही प्रहरी प्रमुख एसपी योगेन्द्रकुमार खड्कालाई टेलिफोनमा ‘प्रहरी संगठनमाथि लुटेरा’ को आरोप लगाएका थिए । यादव र खड्काबीच बिहीबार भएको संवाद् सामाजिक सञ्जालमा सार्वजनिक भएको छ ।
उक्त संवादमा यादवले प्रहरीहरु ‘मधेसमा लुट्न आउने’ गरेको आरोप लगाएको सुनिन्छ । यादवले व्यवसायीलाई दुःख दिएको भन्दै प्रहरीप्रति आक्रोश पोखेका छन् ।
प्रहरीका केन्द्रीय प्रवक्ता डिआईजी विनोद घिमिरेले उक्त प्रकरणबारे छानबिन गर्न मधेस प्रदेश प्रहरी कार्यालयलाई निर्देशन दिइएको बताए ।
मधेस प्रदेश प्रहरी प्रमुख डिआईजी उमाप्रसाद चतुर्वेदीले घटनामाथि छानबिन र कानूनी कारबाहीको प्रक्रिया अघि बढाइएको बताए ।
