पत्रकार दिलभूषण पाठकलाई पक्राउ गर्न प्रहरी परिचालन

काठमाण्डू, २८ जेठ– पत्रकार दिलभूषण पाठकलाई पक्राउ गर्न प्रहरी परिचालन गरिएको छ । पत्रकार पाठकलाई पक्राउ गर्न नक्साल भाटभटेनी स्थित अम्रपाली ब्यांक्वेट नजिकै उनको घरमा सादा पोसाकका प्रहरी खटिएका हुन् ।

उनीहरूलाई साइबर ब्युरोबाट परिचालन गरिएको ब्युरोका एक जना अधिकृतले जानकारी दिएका छन । पाठकविरुद्ध काठमाण्डू जिल्ला अदालतबाट पक्राउ पुर्जी जारी भएको छ । उनी विरुद्ध विद्युतीय कारोबार ऐन–२०६३ अन्तर्गतको कसुरमा जाहेरी दर्ता भएको ब्युरोका एक जना अधिकृतले जानकारी दिएका छन ।

कांग्रेस सभापति शेरबहादुर देउवाका छोरा जयवीर देउवाले नक्सालस्थित हिल्टन होटल खरिद गरेको भन्दै पाठकले आफ्नो युट्युब च्यानलमा टफ टकमा ‘टफ एक्स्प्लेनर’ सामग्री प्रसारण गरेका थिए ।

त्यसबारे उनी विरुद्ध साइबर अपराध गरेको उजुरी परेको थियो । होटल शंकर ग्रुपको स्वामित्वमा छ । होटलका प्रबन्ध निर्देशक शाहिल अग्रवाल र व्यापारी दीपक भट्टसँग मिलेर उनले होटल खरिद गरेको पाठकले समाचारमा दाबी गरेका थिए ।