- आइतबार, ११ जेठ, २०८२
सुनसरी, १० जेठ- शनिबार साँझ सुनसरीको बराहक्षेत्र नगरपालिका–३ अन्तर्गतको कालिन्द्र सामुदायिक बन क्षेत्रमा प्रहरीले गोली प्रहार गरेको छ ।
करिब साँझ ८ बजेतिर भएको घटनामा एक व्यक्ति घाइते भएका छन् ।
गाँजासम्बन्धी शंकास्पद गतिविधिमा संलग्न व्यक्तिहरूलाई नियन्त्रणमा लिने क्रममा प्रहरीले तीन राउन्ड गोली चलाएको हो ।
घटनामा ५५ वर्षीय रामप्रसाद लिम्बू घाइते भएका छन् । उनको दाहिने तिघ्रामा गोली लागेको र हाल उनी धरानस्थित बीपी कोइराला स्वास्थ्य विज्ञान प्रतिष्ठानमा उपचार गराइरहेका छन् ।
प्रहरी स्रोतका अनुसार केही व्यक्ति शंकास्पद बोरा बोकेर जंगल हुँदै हिँडिरहेका थिए । रोक्न खोज्दा लिम्बूले खुकुरी निकालेर प्रहरीलाई आक्रमण गर्ने प्रयास गरेका थिए ।
त्यसपछि आत्मरक्षाका लागि गोली चलाउनु परेको प्रहरीको भनाइ छ । अन्य व्यक्ति भने बोरा छाडेर भागेका छन् ।
हाल घटनाबारे थप अनुसन्धान भइरहेको प्रहरीको भनाइ छ ।
