- शनिबार, २७ असार, २०८३
काठमाण्डू, २७ माघ– नागरिक उन्मुक्ति पार्टीका संरक्षक रेशम चौधरीले नेपाल समाजवादी पार्टी (नयाँ शक्ति) का अध्यक्ष समेत रहेका पूर्व प्रधानमन्त्री डा. बाबुराम भट्टराईलाई आफ्नै वर्गबाट अलग्गिन परे पनि चिन्ता नगर्न आग्रह गरेका छन ।
आज (आइतबार) काठमाण्डूको कमलादी स्थित प्रज्ञा–भवनमा जारी नेसपा नयाँ शक्ति को पहिलो महाधिवेशनलाई सम्बोधन गर्ने क्रममा चौधरीले आफूहरूले बाबुराम भट्टराई नभई बाबुराम नेपाली चाहेको बताएका छन । उनले भने, ‘बाबुरामजी के गर्नु तपाईं विधि विधान सबै मिलाउन जान्ने व्यक्ति । तपाईंलाई तपाईंकै वर्गले अलग्याए ।
चिन्ता नगर्नोस् तपाईं रत्तिभर चिन्ता नगर्नुस्,’ ‘हामी तपाईंलाई मिलाउँछौं । हामी तपाईंलाई बाबुराम भट्टराई होइन, बाबुराम नेपाली बनाउन चाहन्छौं । हामीलाई नेपाली बाबुराम चाहिएको छ ।’ सोही प्रसंगमा बोल्दै चौधरीले गैरआवासीय नेपाली नागरिकलाई भिसा निःशुल्क दिनेगरी सरकारले ल्याएको अध्यादेशको विरोध गरे ।
उनले भने, ‘नेपाली नेपाली भन्ने नेपालभित्र छोरी पनि छैन, ज्वाईं पनि छैन, भाइ पनि छैन , सम्धी पनि छैन । सबै उता छन् । सुन्दैछु उताका मान्छेलाई पनि भिसा दिने रे । उताका मान्छेलाई पनि नागरिकता दिने रे,’ ‘पैसा कमाउनेले १० वर्षसम्म भिसा निशुल्क पाउने रे । हलो जोत्नेले मलमा समेत कर बुझाउनुपर्ने । पैसा कमाउने डलर कमाउनेलाई भिसा निशुल्क । राम राम राम सम्धी कै सम्बन्ध भयो हैन त बाबुराम जी ?’
