रिहा भएपछि रविको प्रतिक्रियाः चितवन देवभूमि हो, यहाँबाट परिवर्तन जन्मिएरै छाड्छ

काठमाण्डू, २४ माघ– पूर्व उपप्रधान एवं गृहमन्त्री समेत रहेका राष्ट्रिय स्वतन्त्र पार्टी (रास्वपा)का सभापति रवि लामिछानेले रिहा भएपछि चितवनबाट परिवर्तन जन्मिएरै छाड्ने प्रतिक्रिया दिएका छन् ।

आज बिहीबार चितवन जिल्ला अदालतबाट धरौटीमा रिहा भएपछि सञ्चारकर्मीलाई संक्षिप्त प्रतिक्रिया दिने क्रममा सभापति लामिछानेले यस्तो बताएका हुन । लामिछानेले चितवनलाई देवभूमि भएकाले यही भूमिबाट देशले न्याय पाउने कुरामा आफू विश्वस्त रहेको पनि बताए । उनले भने, ‘हाम्रो चितवन भनेको देवभूमि हो । देवता बस्ने ठाउँ हो । देवताजस्ता मान्छे बस्ने ठाउँ हो यो ।

त्यसकारण यसले मलाई होइन देशलाई न्याय गर्छ भन्ने कुरामा विश्वस्त छु,’ सभापति लामिछानेले भने, ‘अहिले कुम्भमेला चलेको छ भनिएको छ । हाम्रो देवघाटमा स्नान गर्नु भनेको कुम्भमेलामा सयौंपटक स्नान गर्नु बराबर हो भनेर सयौं मान्छेले भनेका छन् ।

त्यस्तो ठाउँ हो यो ठाउँ ।’ साथै, उनले अघिल्लो निर्वाचनबाटै चितवनले परिवर्तनको सुरुवात गरेको पनि बताएका छन । आज जिल्ला अदालत चितवनका न्यायाधीश दयाराम ढकालको एकल इजलासले उनलाई ५४ ला रुपैयाँ धरौटीमा छाड्ने आदेश दिएको थियो ।