जहाज अवतरण गर्ने बेला धावनमार्गमा कुकुर दौडिएपछि…
काठमाण्डु टुडे
२०८१ पुष १ गते १५:२९ मा प्रकाशित
काठमाण्डु, १ पुस– काठमाण्डुबाट सुर्खेत उडेको आन्तरिक वायुसेवा कम्पनी श्री एयरलाइन्सको एउटा जहाज अवतरण गर्ने बेला सुर्खेत विमानस्थल धावनमार्गमा कुकुर दौडिएपछि अवतरणमा अवरोध सिर्जना भएको छ ।
श्री एयरलाइन्सको ‘(एन–एओके’ दर्ता नम्बर रहेको ८० सिट क्षमतायुक्त ‘ड्यास ८ क्यु४०)’ सिरिजको जहाज सोमबार दिउँसो १ बजे सुर्खेत विमानस्थल अवतरण गर्ने तालिका अनुसार काठमाण्डुबाट उडेको थियो ।
विमानस्थल नजिक पुगेर अवतरण गर्न लागेका बेला धावनमार्गमा कुकुर दौडिएपछि जहाजलाई ‘टर्न’ गरेर एक फन्का घुमाइएको श्री एयरलाइन्सका कर्पोरेट म्यानेजर अनिल मानन्धरले जानकारी दिएका छन ।
जहाज पूर्ण यात्रु क्षमतामा उडेको थियो । जहाज र यात्रु सबै सकुशल छन् । उक्त जहाज पुनः यात्रु बोकेर सुर्खेतबाट काठमाण्डु फर्किसकेको उनले जानकारी दिएका छन ।
