- शुक्रबार, ८ साउन, २०८३
काठमाण्डु, २४ भदौ– ललितपुरमा २३ महिनाकी छोरीको हत्या आरोपमा आमा पक्राउ परेकी छन् ।
पक्राउ पर्नेमा काभ्रेको पनौती घर भई कोन्ज्योसोम गाउँपालिका–३ दलचोकीकी २१ वर्षीया प्रमिला भण्डारी रहेको प्रहरीले जनाएको छ ।
ललितपुर प्रहरी परिसरका एसपी नरेशराज सुवेदीका अनुसार प्रमिलाले २७ साउनमा छोरी पृन्सिका घरबाटै हराएको भन्दै प्रहरीमा जानकारी दिएकी थिइन् ।
पृन्सिका २८ साउनमा कोन्ज्योसोम गाउँपालिका–३ सिलिङ्गेबेसीमा पानीमा डुबेको अवस्थामा खोलामा मृत भेटिएकी थिइन् ।
घटना शंकास्पद लागेकाले प्रमिलालाई सोधपुछ गर्दा हत्या भएको खुलेको हो । प्रमिलाले रिसको झोकमा दुई थप्पड हिर्काउँदा अचेत भएपछि छोरीलाई खोलामा लगेर फालेको स्वीकार गरेकी छन् ।
आफूसँग विवाद भएपछि श्रीमान घर छाडेर आफन्तको घरमा बस्न गएका बेला घटना भएको प्रमिलाले बताइन् ।
कर्तव्य ज्यान कसुरमा जिल्ला अदालत ललितपुरको अनुमतिले हिरासतमा राखेर अनुसन्धान अघि बढाइएको एसपी सुवेदीले बताए ।
