- मंगलबार, १६ असोज, २०८०
काठमाण्डु, ८ साउन– कांग्रेस महामन्त्री गगनकुमार थापाले फौजदारी अभियोग लागेका नेतालाई निलम्बन गर्नुपर्ने प्रस्ताव पेस गरेका छन् ।
सोमबार केन्द्रीय समिति बैठकमा सदस्यहरुले राखेको धारणाबारे जवाफ दिने क्रममा थापाले १३ बुँदे प्रस्ताव राखेका हुन् । अनुसन्धान गर्ने निकायले तीन वर्षभन्दा बढी सजाय माग गरेर मुद्धा दायर गरेको अवस्थामा काँग्रेसका कुनै पनि जिम्मेवारीमा रहेका व्यक्तिले स्वघोषणा गरेर पार्टीबाट अलग हुनुपर्ने र नभए निलम्बन गर्नुपर्ने उनको भनाइ थियो ।
काँग्रेस भएकै कारण गल्ती गर्दा छुट पाउने र काँग्रेस भएकै कारण बिना गल्ती सजाय पाउने दुवै कुरा हुन नसक्ने उनको प्रष्टोक्ति थियो ।
‘कुनै पनि व्यक्तिमाथि फौजदारी अभियोग लाग्छ भने पार्टीसँग अलग राख्नुपर्छ’, प्रस्तावमा उनले भनेका छन् ।
बैठकमा नेता बालकृष्ण खाँण नक्कली भुटानी शरणार्थी प्रकरणमा पक्राउ पर्दा पार्टी नेताहरुले नै गृहमन्त्री नारायणकाजी श्रेष्ठलाई भेटेर धन्यवाद दिएको र सार्वजनिक रुपमा बचाउ नगरेको भन्दै संस्थापन पक्षधर केन्द्रीय सदस्यहरुले आपत्ति जनाएका थिए ।
