पारसको विस्फोटक ब्याटिङ, कुवेतविरुद्ध नेपालको शानदार जित

काठमाण्डु, ११ साउन– कप्तान पारस खड्का ब्याटिङमा चम्किएपछि आईसीसी टी–२० विश्वकप क्रिकेटअन्तर्गत सिंगापुरमा जारी एसियाली छनोट प्रतियोगिताको तेश्रो खेलमा कुवेत नेपालसँग सात विकेटले पराजित भएको छ ।

कुवेतले नेपाललाई दिएको १ सय ४२ रनको लक्ष्य पछ्याउने क्रममा पारसले ४२ बलमा ११ चौका र एक टक्काको मद्दतमा ६८ रन जोडे । पारसको विस्फोटक व्याटिङको मद्धतमा नेपालले कुवेतले दिएको लक्ष्य १५. ५ ओभरमा २५ बल बाँकी छँदै भेट्टायो । पारसपछि शरद भेष्वाकरले नेपालका लागि नट आउट ३० बलमा ४ चौका र एक छक्का हान्दै ३८ रन जोडे ।

त्यसअघि टस जितेर नेपालले कुवेतलाई पहिले ब्याटिङको निम्तो दिएको थियो । कुवेतले निर्धारित २० ओभरमा ९ विकेटको क्षतिमा १ सय ४१ रन जोड्यो । कुवेतका लागि कप्तान मुहमद कासिफले सर्वाधिक ४९ रन बनाए । उनले ३६ बलमा २ चौका र ४ छक्का प्रहार गरे । कुवेतका लागि अदनान इद्रेसले २५ र मोहमद असलामले २३ रनको योगदान दिए । नेपालका लागि सन्दीप लामिछाने र वसन्त रेग्मीले समान ३÷३ र करन केसीले दुई र अविनास बोहराले १ विकेट लिए । नेपाल पाँच देश सहभागी प्रतियोगिताको पहिलो खेलमा कतारसँग चार विकेटले पराजित भएको थियो । प्रतियोगितामा छनौट हुन अब नेपाल सबै खेल जित्नैपर्ने दबाबमा छ । राउन्ड रोविन लिगका आधारमा सञ्चालित प्रतियोगिताको शीर्ष टोली आगामी अक्टोबरमा यूएईमा हुने ग्लोबल क्वालिफायरका लागि छनोट हुनेछ ।