- बिहीबार, १ जेठ, २०८२
भक्तपुर, २६ मंसिर– जिल्लाका अधिकांश डेन्टल क्लिनिक दर्ताबिना नै सञ्चालन रहेको पाइएको छ । जिल्ला जनस्वास्थ्य कार्यालयका अनुगमनका क्रममा भक्तपुरमा १० वटा डेन्टल क्लिनिक मात्र दर्ता गरेको पाइएको छ । भक्तपुरका मुख्य–मुख्य चोकमा ३० देखि ३५ क्लिनिक दर्ताबिना नै सञ्चालनमा रहेको कार्यालयले जनाएको छ ।
दर्जनौं क्लिनिक अवैधानिक रहेको पाइए पनि कार्यालयले कारबाही अगाडि नबढाएपछि यस्ता क्लिनिकहरु थपिँदै गएको र दर्तावाला क्लिनिकले जनस्वास्थ्य कार्यालयमा मासिक प्रतिवेदन पेस गर्नुपर्ने प्रावधान रहे पनि यो नियमलाई समेत क्लिनिकले बेवास्ता गरेको कार्यालयको भनाइ छ ।
यस्ता क्लिनिकले आम्दानीको पाँच प्रतिशत कर बुझाउनुपर्ने प्रावधान रहे पनि कारबाही हुन नसक्दा लाखौं रुपैयाँको कर छली भइरहेको कार्यालयका कर्मचारीले बताएका छन् ।
भक्तपुर र मध्यपुरथिमीका अधिकांश अवैधानिक क्लिनिकले सेवाग्राहीसँग चर्को शुल्क लिएको उपभोक्ताको गुनासो रहेको छ । मुख्य चोक दूधपाटी, सूर्यविनायक, ब्यासी, मध्यपुरथिमी, कौशलटार, गठ्ठाघर, लोकन्थलीलगायतका स्थानमा दर्ताबिना नै डेन्टल क्लिनिक सञ्चालन भइरहेको छ ।
रासस
