- बिहीबार, ६ चैत, २०८१
काठमाण्डु, ४ मंसिर– वैदेशिक राजगारीका क्रममा निधन भएका नेपाली श्रमिकका परिवारले पाउने क्षतिपूर्ति ती मुलुकस्थित नेपाली राजदूतले नै खाने गरेको खुलासा भएको छ ।
अख्तियार दुरुपयोग अनुसन्धान आयोगले साउदी अरबका लागि पूर्वनेपाली राजदूत हमिद अन्सारीविरुद्ध मृतक परिवारका लागि आएको रकम आफैं लिएको अभियोगमा मुद्धा दायर गरेपछि उक्त खुलासा भएको हो ।
अन्सारीले मृतक परिवारका नाममा आएको रकम निकालेर आफ्नै बैंक खातामा जम्मा गरेको पुष्टि भएको छ । अख्तियारका अनुसार अन्सारीले मृतक परिवारले पाउनुपर्ने ३ लाख ९६ हजार रुपैयाँ आफैं लिएका थिए ।
उनले साउदीमा मृत्यु भएका बागलुङका होमबहादुर पुनले भाइको मृत्युपछि रोजगारादाता कम्पनीले उपलब्ध गराएको २० हजार रियाद अन्सारीले खाएको भन्दै अख्तियारमा उजुरी दिएका थिए ।
अन्सारी २०६४ माघदेखि २०६७ माघसम्म तीन वर्ष साउदीका लागि नेपाली राजदूत थिए । अन्सारी एमाले कोटामा राजदूत भएका थिए ।
यसैबीच अन्सारीले भने आफूमाथि लागेको आरोप अस्वीकार गरेका छन् । उनले मृतकका नाममा आएको चेक दूतावासका लेखापालले साटेको र आफ्नो कुनै संलग्नता नरहेको जिकिर गरेका छन्।
