- बुधबार, १७ असार, २०८३
काठमाण्डु, ३० कात्तिक – संवैधानिक तथा राजनीतिक संवाद समितिका सभापति डा. बाबुराम भट्टराई प्रमुख पार्टीहरुबीच सहमति हुन नसक्ने निष्कर्षमा पुगेका छन् । प्रमुख प्रतिपक्षी दल एकीकृत माओवादीका वरिष्ठ नेता तथा पूर्वप्रधानमन्त्री समेत रहेका भट्टराईले आइतबार आफ्नो ट्वीटरमा सहमतिको प्रक्रियालाई तेल निकाल्न ‘बालुवा पेल्ने काम’ भइरहेकाे टिप्पणी गरेका छन् ।
केही दिन यता सत्तारुढ नेपाली कांग्रेस र नेकपा एमालेका शीर्ष नेताहरुसँग निरन्तर संवादमा रहेका र संवाद समितिको बैठकमा समेत छलफल चलाइरहेका डा. भट्टराईको निराशापूर्ण अभिव्यक्तिले तीन दलहरु सहमतिमा संविधान निर्माण नगर्ने टुंगोमा पुगेको संकेत गरेको छ ।
‘बालुवा पेल्ने क्रम जारी छ ! तेल निस्कन्छ, निस्कन्न भन्न गाह्रो छ !’ भट्टराईले आइतबार साँझ ट्वीट गरेका छन् ।
अभिव्यक्तिमा उखानटुक्का र प्रसिद्ध भनाइहरुलाई जोड्न सिपालु माओवादी नेता भट्टराईले नेपाली उखान ‘बालुवा पेलेर कहिले तेल निस्कन्छ र ?’ भन्ने उखानको सहारा लिएर पार्टीहरुबीचको असहमतिलाई सार्वजनिक गरेका हुन् ।
उनले शनिबार मात्रै संस्कृतको ‘कर्मण्येवाधिकारस्थे मा फलेसु कदाचन’ अर्थात् ‘कर्म गर, फलको आशा नगर’ भन्ने गीताश्लोक ट्वीट गर्दै आफूले प्रधानमन्त्रीलाई भेट्न लागेको जानकारी गराएका थिए ।
