- शुक्रबार, १४ वैशाख, २०८१
रौतहट, ११ कात्तिक – जिल्ला प्रहरी कार्यालय रौतहटले २० किलो चाँदीसहित एक जनालाई सोमबार पक्राउ गरेको छ ।
सदरमुकाम गौरस्थित कबिरचौकबाट २० केजी चाँदीसहित गरुडाबैरिया–६ का १६ वर्षीय राजन झालाई पक्राउ गरिएको प्रहरी निरीक्षक रामप्रकाश चौधरीले जानकारी दिए ।
काठमाण्डुबाट ल्याइएको चाँदी तस्करी मार्फत भारततर्फ लैजान लागेको विशेष सूचनाका आधारमा जिल्ला प्रहरी कार्यालयबाट खटिएको टोलीले झाको झोला खानतलासी गर्दा उक्त चाँदी बरामद भएको प्रहरीले जनाएको छ ।
बरामद गरिएको चाँदी तथा अभियुक्तलाई आवश्यक कारबाहीका लागि राजस्व अनुसन्धान कार्यालय पथलैया बारामा बुझाउने तयारी भइरहेको छ ।
