- मंगलबार, १६ असार, २०८३
काठमाण्डु, १० कात्तिक – छोराको हत्यारालाई कारबाहीको माग गर्दै अनसनकै अवस्थामा मृत्यु भएका नन्दप्रसाद अधिकारीको अन्त्येष्टी सरकारले गर्ने निर्णय गरेको छ ।
मृत्यु भएको महिनौं बित्दा पनि अधिकारीको छोरा नुरप्रसाद शव बुझ्न नआएपछि मन्त्रिपरिषदको सोमवारको बैठकले नन्दप्रसादको अन्त्येष्टि प्रक्रिया अगाडी बढाउने निर्णय गरेको हो ।
उनको शव शिक्षण अस्पताल महाराजगन्जमा छ । बुवासँगै अनसन बसेकी आफ्नी आमालाई समेत नुरप्रसाद वेवास्ता गरिरहेको स्रोतले जनाएको छ । उनले अनसन तोडाउन सरकारसँग करोडौं रकम माग गरेका थिए ।
त्यस्तै नन्दप्रसादकी श्रीमती गंगामायाको जीवनयापनको व्यवस्था पनि सरकारले गर्ने भएको छ । सरकारको विशेष आग्रहमा नन्दमायाले गत साता अनसन तोडेकी थिइन् ।
गोर्खा फुजेलका नन्दप्रसाद र गंगामायाले सशस्त्र द्वन्द्वकाल विद्रोहीपक्षबाट मारिएको आफ्नो छोरो कृष्णप्रसादको हत्यामा संलग्नलाई पक्राउ गरी कारवाहीको माग गर्दै वीर अस्पतालमा आमरण अनसन बसेका थिए । अनसन बसेकै अवस्थामा नन्दप्रसादको निधन भएको थियो । गंगामायाले भने गत साता अनसन तोडेकी थिइन् ।
सोमबार बसेको मन्त्रिपरिषद बैठकले राष्ट्रिय महिला आयोगको सदस्यमा भगवती घिमिरेलाई नियुक्त समेत गरेको छ ।
