काठमाण्डु, ३१ असोज– नेपालमा गम्भीर सुरक्षा ‘थ्रेट’ भएको भन्दै भारतीय दूतावासले गोप्य लिखित सूचना दिएपछि गृह मन्त्रालयले सिरियालगायत इस्लामिक मुलुकबाट नेपाल प्रवेश गर्ने यात्रुको गतिविधिलाई निगरानीमा राख्न सुरक्षा निकायालाई निर्देशन दिएको छ । ।
सूचना सार्वजनिक भएपछि सुरक्षा निकायका प्रमुखहरुको बैठक दिनहँजसो बसिरहेको छ । सोही विषयबारे छलफल गर्न बिहीबार गृहसचिवको अध्यक्षतामा बसेको सुरक्षा प्रमुखहरुको बैठकले सिरियालगायत इस्लामिक मुलुकका नागरिक प्रवेश गर्दा विशेष निगरानी गर्नुपर्ने निष्कर्ष निकालेको हो ।
प्रहरी प्रवक्ता माधव जोशीले विमानस्थलको सुरक्षामा कडाइ गर्न सुरक्षा डेस्क खडा गरिएको बताए ।
उक्त डेस्कले विमानस्थल सुरक्षामा खटिएका प्रहरीसँग समन्वय गरी विदेशी यात्रुको गतिविधि निगरानी गर्नेछ । डेस्कले बुधबार नै काम सुरु गरिसकेको छ ।