- शनिबार, १३ असार, २०८३
काठमाण्डु, २० भदौ – संविधानसभाका अध्यक्ष सुवासचन्द्र नेम्बाङले आगामी माघ ८ गतेभित्र संविधान जारी गर्ने तयारी भइरहेको बताएका छन् ।
निजामती सेवा दिवस–२०७१ को अवसरमा नेपाल राष्ट्रसेवक कर्मचारी सङ्गठनद्वारा आयोजित सम्मान तथा प्रमाणपत्र वितरण कार्यक्रममा उनले पहिलो संविधानसभाले ८० प्रतिशत काम सकिसकेको र बाँकी २० प्रतिशत कामका लागि संवैधानिक– राजनीतिक संवाद तथा सहमति समिति क्रियाशील भई लागिरहेकाले माघ ८ मा संविधान जारी हुने सम्भावना बढ्दै गएको बताए ।
उनले भने “संविधान जारी गर्ने समय चार वर्षको भए पनि संविधानसभा र दलहरुले एक वर्षभित्र संविधान जारी गर्ने प्रतिबद्धता व्यक्त गरेको अवस्थामा भोलि अर्थात् यही भदौ २१ गतेभित्रमा विवादित विषयमा दलहरुबीच सहमति गर्न तीव्र प्रयास भइरहेको छ ।”
अध्यक्ष नेम्बाङले संवाद तथा सहमति समितिले माघ ८ मा संविधान जारी गर्न संविधानसभा बाहिर रहेका असन्तुष्ट दलहरुलाई सहमतिमा ल्याउन पहल गरिरहेको बताए ।
दल र दलका नेताले माघ ८ भित्रमा संविधान जारी गर्ने प्रतिबद्धता व्यक्त गरे पनि ढुक्क भएर बस्ने अवस्था नरहेको बताउँदै सकारात्मक दबाबका लागि नागरिक समाज, बौद्धिक वर्गलगायत सर्वसाधारणसँग आग्रह गरे ।
