- शनिबार, ८ वैशाख, २०८१
जाजरकोट, २४ फागुन – सरकारी सहयोगको अभावले जाजरकोटका नेपाली कागज उद्योग संकटमा परेका छन् ।
उद्योग सञ्चालनमा सरकारी सहयोग नपाउँदा उद्योग सञ्चालनमा समस्या देखिएको हो ।
जिल्लामा २२ वटा उद्योग दर्ता भए पनि अहिले आधा दर्जनमात्रै सञ्चालनमा रहेका छन् । स्थानीयस्तरमा रोजगारी सिर्जना गर्ने उद्योग बन्द भएपछि स्थानीय जनताको रोजगारीको अवसर गुमेको छ ।
उद्योग सञ्चालनका लागि सरकारले सहुलियतमा ऋण तथा अनुदान सहयोग दिनुपर्ने सञ्चालकहरुको माग छ । जाजरकोटका जङ्गलमा पाइने सेतबोक्रोको लोक्ताबाट नेपाली कागज बनाउने गरिएको छ ।
जाजरकोटमा बनेको नेपाली कागज उच्च गुणस्तरको भएकाले विदेशमासमेत निर्यात हुने गरेको व्यापारी बताउछन् । तीस वर्ष पहिलेदेखि उद्योग सञ्चालनमा आए पनि सरकारी तवरबाट भने कुनै सहयोग नपाएको गुनासो छ ।
उद्योग सञ्चालनमा सहयोग नपाउँदा जिल्लाका उद्योग बन्द हुने क्रम बढेको छ । आधुनिक प्रविधिको विकास र सरकारी उपेक्षाका कारण जिल्लामा कागज उद्योग विकास हुन नसकेको हो ।
