फूटपाथका व्यापारी लखेट्दै वामदेव

काठमाण्डु, १४ फागुन – वामदेव गौतम उपप्रधान तथा गृहमन्त्री बनेको भोलिपल्टै सडकमा त्यसको प्रभाव देखिएको छ । कार्यभार सम्हालेको दिन नै आफू मातहतका निकायलाई गौतमले ५ बुँदे निर्देशन दिएका थिए ।

सोही निर्देशन अनुसार फूटपाथका व्यापारी हटाउन थालिएको छ । महानगरीय प्रहरीले बुधबार अनामनगर लगायतका क्षेत्रका फूटपाथ व्यापारीहरुलाई हटाएको छ । प्रहरीले ठेला लगायतका साधनमा सडकमा व्यापार गर्नेहरुलाई लखेटेको छ, भने केहीलाई नियन्त्रणमा लिएको छ ।

वामदेवको ५ बुँदे निर्देशनको तेस्रो बुँदामा, ‘राजधानीभित्रका फूटपाथ कब्जा गरी व्यापार व्यावसाय गरिरहेका व्यापारीहरुलाई वैकल्पिक व्यवस्था गर्दै सडक यातायातलाई व्यवस्थित गर्ने,’ उल्लेख छ ।

यसअघि एमाओवादी अध्यक्ष पुष्पकमल दाहाल प्रचण्डको सरकारमासमेत गृहमन्त्री बनेका वामदेवले सो समय पनि फुटपाथ खाली गर्ने र रात्री व्यवसायलाई व्यवस्थित पार्ने कामलाई प्राथमिकता दिएका थिए ।