- मंगलबार, १८ मंसिर, २०८१
काठमाण्डु, ८ माघ – संसदीय दलको नेता टुंगो लगाउन बसेको एमाओवादी संसदीय दलको बैठक विना निष्कर्ष टुंगिएको छ ।
पार्टी मुख्यालय पेरिसडाँडामा बसेको बैठकमा संसदीय दलको नेता चयन गर्ने विषयमा छलफल भएपनि कुनै निर्णय भएन ।
अघिल्लो संविधानसभामा अध्यक्ष पुष्पकमल दाहाल ‘प्रचण्ड’ संसदीय दलको नेता थिए ।
सो अवसरमा संविधानसभा बैठकमा सभासदहरुले खेल्नु पर्ने भूमिकाका विषयमा समेत छलफल भएको थियो ।
दोस्रो संविधानसभामा एमाओवादीबाट प्रतिनिधित्व गर्ने अधिकांश नयाँ अनुहार भएकाले उनीहरुले खेल्नुपर्ने भुमिका र पार्टी नीतिबारे जानकारी गराइएको एमाओवादीले जनाएको छ ।
संविधानसभामा एमाओवादीका ८० सभासद छन् ।
त्यसअघि पार्टी कार्यालयमा नै केन्द्रीय समितिको बैठक बसेको थियो । बैठकमा अध्यक्ष प्रचण्डको प्रतिवेदनमाथि केन्द्रीय सदस्यहरुले धारणा राखेका थिए । बैठक माघ २ गतेदेखि जारी छ । २ सय ६८ केन्द्रीय सदस्य मध्ये अधिकांशले धाराणा राख्न बाँकी नै छ । सबै सदस्यहरुलाई १०–१० मिनेट बोल्न दिइएको छ ।
यो अवस्था हेर्दा बैठक अझै केही दिन लम्विने देखिएको छ ।
