अनुकूलनका लागि साढे चार करोड रुपैया

मुगु, १५ मङ्सिर–जलवायु परिवर्तनका कारण बढी प्रभावित हुन सक्ने जिल्लाका पाँच गाविसमा नेपाल जलवायु परिवर्तन सहयोग कार्यक्रमअन्र्तगत साढे चार करोड रुपैयाको लगानीमा स्थानीय अनुकूलन कार्यक्रम सञ्चालन हुने भएको छ ।
जिल्लाका रुगा, रोवा, माँग्री, जिमा र सुकाढीक गाविसमा जलवायु परिवर्तनले पार्न सक्ने असरलाई न्यूनीकरण गर्न कार्यक्रम सञ्चालन गरिने जिविस मुगुले जनाएको  छ । जलवायु परिवर्तनका कारण सङ्कटमा रहेका गाविसको पहिचान गरी सञ्चालन हुन लागेको स्थानीय अनुकूलन कार्यक्रमअन्तर्गत लैङ्गिक तालिम, महिला सशक्तीकरण, सामाजिक समावेशीकरण, क्षमता अभिवृद्धि, प्राकृतिक तथा जैविक विविधताको संरक्षण र  वैकल्पिक ऊर्जा प्रर्बद्धनका क्षेत्रमा कार्यक्रम लक्षित गरिने  स्थानीय अनुकूलन कार्यक्रम कार्यान्वयन  मुगुका कार्यक्रम अधिकृत दिनेश आचार्यले जानकारी दिए ।
बेलायती अन्तर्राष्ट्रिय सहयोग नियोग (डिएफआइडी) र युरोपेली सङ्घको आर्थिक सहयोग तथा संयुक्त राष्ट्र सङ्घ विकास कार्यक्रमको प्राविधिक सहयोगमा सञ्चालन हुने कार्यक्रमको अवधि सन् २०१५ सम्म छ ।
पाँच गाविसका एक हजार ९९९ घर परिवार लाभान्वित हुने लक्ष्य लिइएको कार्यक्रम सञ्चालनका लागि स्थानीय गैरसरकारी संस्था छनोट गरी गाविसस्तरमा नै स्थानीय अनुकूलन समन्वय समितिसमेत गठन गरिने छ ।  नमुना परियोजनाका रुपमा सुरु भएको सो कार्यक्रम सुदूर र मध्यपश्चिमका १४  जिल्लामा सञ्चालन गर्न लागिएको र पछि देशका अन्य जिल्लामा समेत सञ्चालन हुने बताइएको छ । रासस