- शुक्रबार, ४ असोज, २०८१
महोत्तरी, १३ मंसिर– भारतबाट भन्सार छली ल्याइएको रु दुई लाखभन्दा बढी मूल्यका किराना सामान महोत्तरी प्रहरीले आज सुन्दरपुरबाट बरामद गरेको छ ।
इलाका प्रहरी कार्यालय गौशालाबाट गएको गस्ती टोलीले सुन्दरपुर–८ स्थित बाटाबाट भन्सार छली नेपाल भित्र्याइएका पाँच क्विन्टल ५० किलो चिनी, १२ टिन र ५३ कार्टुन खानेतेल, २० कार्टुन बिस्कुटलगायत किराना सामान बरामद गरेको प्रहरी निरीक्षक दीपक गिरीले बताए ।
भारतबाट चोर बाटो हुँदै भन्सार छली गरेर नेपाल भित्र्याइएका ती सबै सामान ल्याउने व्यक्तिको समूहले प्रहरीलाई देखेपछि सामान छाडेर भागेको बताइएको छ । ती सामान इलाका प्रहरी कार्यालय गौशालाले आवश्यक कारबाहीका लागि जिल्ला भन्सार कार्यालय जलेश्वरमा बुझाएको छ । रासस
