चुनावसँगै बजार अनुगमन सुस्तायो, नुन प्रतिप्याकेट ५० रुपैयाँ तिर्न उपभोक्ता बाध्य

रौतहट, २९ कात्तिक–संविधानसभा निर्वाचनमा केन्द्रित हुनुपर्ने बताउँदै जिल्लास्तरीय अनुगमन समितिले बजार अनुगमन गर्न तदारुकता नदिएपछि रौतहटमा उपभोक्ता ठगिन थालेका छन् । जिल्लाकै प्रमुख व्यापारिक केन्द्र रहेको सदरमुकाम गौरसहित गङ्गापिपरा, गरुडा, समनपुर, कटहरिया, राजपुरलगायतका बजार क्षेत्रमा रहेका किराना पसलले मनोमानी ढङ्गले मूल्य निर्धारण गरेको पाइएको छ ।

किराना पसलको अनुगमन नहुँदा विभिन्न सामग्रीको कृत्रिम अभाव देखाई उपभोक्ताहरु ठगिएका हुन् । रौतहट जिल्लाको विभिन्न बजारमा कालाबजारी सुरु भएको छ । दैनिक उपभोग्य बस्तुको कृत्रिम अभाव देखाई मूल्य बृद्धि गरी बिक्री–वितरण गरिँदा सर्वसाधारण मर्कामा परेका छन् ।

बिहीबार दिउँसोदेखि प्रति प्याकेट ५० देखि सय रुपैयाँसम्ममा नुन बिक्री गर्दा आफूहरु ठगिएको उपभोक्ताले बताएका छन् । बजारमा म्याद नाघेका र मूल्यसूचीबिना नै व्यापारीले सामान बेच्ने क्रम नरोकिएको उपभोक्तावादी अधिकारकर्मीले बताएका छन् ।

उद्योग वाणिज्य सङ्घ रौतहटका अध्यक्ष कन्तमन्नी जैसवालले उपभोक्तालाई सहज रुपमा नुन उपलब्ध गराउन आग्रह गर्दै कृत्रिम अभाव देखाई कालाबजारी गरी कारबाहीमा परे व्यवसायी स्वयम् जिम्मेवार हुने बताए । नेकपा–माओवादीलगायत ३३ दलको बन्दकै कारण जिल्लामा उपभोग्य वस्तुको कृत्रिम अभाव भएको हो ।