प्रचण्डको निर्वाचन क्षेत्रमा झलनाथ जाँदै

काठमाण्डु, २७ कात्तिक–संविधानसभा निर्वाचनका प्रचार प्रसारको क्रममा नेकपा (एमाले) का शीर्ष नेताहरु पछिल्लो समयमा आफ्नो चुनावी क्षेत्रका साथै अन्य विभिन्न जिल्लामा हुने चुनावी सभामा सहभागी हुन थालेका छन ।
अन्य क्षेत्रबाट पनि माग भएपछि ठूला आमसभा नगर्ने नीति भएपनि शीर्ष नेताहरुका विभिन्न कार्यक्रम तय भएको एमालेका नेता प्रदिप नेपालले जानकारी दिए ।
यस अन्तर्गत पार्टी अध्यक्ष झलनाथ खनालले बुधवार सर्लाही क्षेत्र नं. २ मा आयोजित ३ वटा चुनावी सभालाई सम्बोधन गरेका थिए भने उनले कात्तिक २९ गते सिरहा क्षेत्र नं. ५ मिर्चैयामा हुुने आमसभालाई सम्बोधन गर्दैछन । एकीकृत माओवादीका अध्यक्ष प्रचण्ड सिराहाको सोही क्षेत्रबाट प्रत्यक्ष तर्फको उम्मेदवार छन । अध्यक्ष खनालले मङ्सिर १ गते इलाम क्षेत्र नं १ मा हुने सभालाई सम्बोधन गर्नेछन ।
यस्तै एमालेका वरिष्ठ नेता माधवकुमार नेपालले बुधवार पर्साको क्षेत्र नं. २, ३ र ५ मा आयोजना भएको क्षेत्रीय सभालाई सम्बोधन गरेका थिए ।
यस्तै स्थायी समिति सदस्य केपी शर्मा ओलीले बुधवार मोरङ क्षेत्र नं. ४ मा आयोजना गरिएको चुनावी सभालाई सम्बोधन गरेका थिए ।
यसैगरी उपाध्यक्ष विद्या भण्डारीले बुधवार धनुषा क्षेत्र नम्बर ४, ५ र ७ मा आयोजित चुनावी सभालाई सम्बोधन गरेकी थिइन ।
यसैगरी यसअघि नै लम्जुङ पुगिसकेका एमाले महासचिव ईश्वर पोखरेलले उपत्यकाका बिभिन्न क्षेत्रमा आयोजित चुनावी सभालाई सम्बोधन गरेका थिए । रासस