- शुक्रबार, १४ वैशाख, २०८१
काठमाण्डु, २४ कात्तिक– अर्को संविधानसभाको निर्वाचनमा प्रतिस्पर्धा गरिरहेका १३० राजनीतिक दलबीच एउटा दल नेपाल बन्द, हडताल, आन्दोलन, नारा, जुलुस, चन्दाआतङ्क बन्द गरौँ भन्ने मूल एजेन्डाका साथ चुनावी मैदानमा देखिएको छ ।
उद्यमी र व्यवसायीको नेतृत्व रहेको नवनेपाल निर्माण पार्टी नामक सो दलको एजेन्डा, प्रचारशैली, उद्देश्य नै फरक र नौलो रहेको छ । कसैलाई चन्दा नदिने र कसैसँग चन्दा नलिने घोषणा गरेको सो दलको राजनीतिक एजेन्डाभन्दा समाजसेवाका उद्देश्यहरु आफ्नो प्रतिबद्धतामा उल्लेख भएकाले गैरसरकारी संस्था नै हो कि भन्ने भान हुन्छ ।
नयाँ नेपाल निर्माणका लागि आर्थिक क्रान्ति ल्याउनुपर्नेमा जोड दिँदै सो दलले बन्द, हडताल, नारा, जुलुस, चन्दाआतङ्क आखिर केका लागि भन्ने प्रश्न अघि सारेको छ । चुनावी सभा घरदैलो, पोस्टर र ब्यानरद्वारा प्रचारप्रसार नगरेको सो दलले आफ्नो कामको मूल्याङ्कन गरी जनताले मत दिने विश्वास राखेको छ ।
चप्पल लगाएर आएका नेताहरुले महल बनाएको बताउँदै सो दलका अध्यक्ष मोति दुगड हामी महलबाट नै आएकाले महल बनाउँदैनाँै, देशको विकास र जनताको सेवामा आफ्नो आम्दानीको खर्च लगाई समर्पित हुन्छौँ भने । रासस
