- शुक्रबार, १४ वैशाख, २०८१
काठमाण्डु, २२ कात्तिक–काठमाण्डुको बौद्धमा भएको कार दुर्घटनामा २ जनाको मृत्यु भएको छ भने एकजना घाईते भएका छन् । दुर्घटनामा कार चालक सिन्धुपाल्चोक मेलम्चीका २९ वर्षीय श्याम कुमार कालिगड र कारमा सवार काभ्रेका ४५ वर्षीय शिव कुँवरको मृत्यु भएको प्रहरीले जनाएको छ ।
घाईते सिन्धुपाल्चोक मेलम्चीका ३१ वर्षीय मिन बहादुर कालिगडको चाबहिलस्थित ओम अस्पतालमा उपचार भईरहेको छ ।
चुच्चेपाटीबाट बौद्धतर्फ तीव्रगतिमा जाँदै गरेको अनटेष्ट कार गएराती सडक छेउँमा रहेको एक घरको गेटमा ठोक्किएर दुर्घटना भएको हो ।
त्रिशुली ट्रक खस्दा चालकको मृत्यु
यसैबीच पृथ्वी राजमार्ग अन्तरगत धादिङको कृष्णभीरबाट शुक्रबार विहान मालबाहक ट्रक त्रिशुली नदीमा खस्दा चालकको मृत्यु भएको छ । काठमाण्डुबाट भैरहवा चाँदै गरेको ना ४ ख २१७० नम्बरको ट्रक शुक्रबार विहान ५ बजेतिर दुर्घटना हुँदा धादिङ चरौंदीका ट्रक चालक सुनिल चेपाङको मृत्यु भएको हो ।
राती चरौंदीस्थित आफ्नै घरमा सुतेका चेपाङ विहान उठेर भैरहवातर्फ जाँदै गर्दा ट्रक दुर्घटना भएको प्रहरीले जनाएको छ । सडकबाट झण्डै डेढ सय फिट तल त्रिशुली नदीमा खसेको ट्रक पानीमा डुबेको छ । ट्रकमा अन्य व्यक्ति भए–नभएको एकीन भएको छैन । घटनास्थलमा बेनीघाट प्रहरी र स्थानीयले खोजीकार्य जारी राखेका छन् ।
