- शुक्रबार, ७ वैशाख, २०८१
काठमाण्डु, २० कात्तिक–राष्ट्रिय निर्वाचन पर्यवेक्षण परिषद् नेपालले संविधानसभा निर्वाचलाई बहिस्कार गर्दै नेकपा–माओवादीले गर्ने भनेको बन्दले आम नागरिकको दैनिक जीवनमा गम्भीर असर पार्ने भन्दै अविलम्ब सो बन्द फिर्ता दिन अपिल गरेको छ ।
परिषद्का अध्यक्ष सुदीप पाठकले बन्दले रोजगारी, व्यापारलगायत संविधानसभा निर्वाचन २०७० लाई गम्भीररूपमा प्रभाव पार्ने भएकाले बन्द फिर्ता लिन अपिल गरेका हुन ।
उनले निर्वाचन बाहिर रहेका सबै राजनीतिक शक्तिलाई अविलम्ब वार्ताका लागि लिखित आग्रह गरी निर्वाचन प्रक्रियामा सरिक बनाउन र निर्वाचनलाई शान्तिपूर्ण बनाउन परिषद्ले सरकार, निर्वाचन आयोग, चार राजनीतिक दल एवम् जिम्मेवार सबै पक्षसँग आग्रह गरेका हुन ।
यसैगरी ट्रान्सपरेन्सी इन्टरनेसनल–नेपालले बन्दबाट नेपाली सर्वसाधारण जनताको जीवनमा गम्भीर असर पर्ने भएकाले नेकपा–माओवादीलाई बन्द फिर्ता लिई आफूलाई जनताको पक्षमा उभ्याउन आह्वान गरेको छ । नेकपा–माओवादी नेतृत्वको ३३ दलीय मोर्चाले कात्तिक २५ देखि मंसिर ५ गतेसम्म निर्वाचन बिथोल्न बन्द आब्हान गरेको छ ।
