- मंगलबार, २५ भदौ, २०८१
काठमाण्डु, २० कात्तिक–शिक्षक सेवा आयोगले स्थायी शिक्षक पदपूर्र्तिका लागि लिएको परीक्षाको नतिजा समयमै प्रकाशित गर्न नसक्ने भएको छ । शिक्षा ऐन अनुसार परीक्षा लिएको ६ महिना भित्र नतिजा प्रकाशन गर्नुपर्ने आयोगलाइ बाध्यता छ । तर, आन्तरिक तयारीमा ढिलाइ भएकाले आयोगले परीक्षाको नतिजा कात्तिक महिना भित्र प्रकाशन गर्न नसक्ने भएको हो ।
‘आयोगको आन्तरीक तयारी पनि ढिलाइ भयो, नतिजा प्रकाशनमा समय लाग्छ,’ आयोगका अध्यक्ष उदयराज सोतीले भने ।
आसन्न संविधानसभाको निर्वाचनको कारण पनि आयोगको काममा असर पर्ने भएको छ । ‘निर्वाचनमा आयोगको कर्मचारी पनि प्रयोग हुने भयो यसले नतिजा प्रकाशनको मिति पर धकेलिन सक्छ,’ अध्यक्ष सोतीले भने । आयोगले उत्तरपुस्तिका कोडिङको कार्य भने सम्पन्न गरेको छ । उत्तपुस्तिका पहिचान हुन नदिन दुईपटक कोडिङ गरेको सोतीले जानकारी दिए ।
आयोगले गत जेठ ९ गतेदेखि ११ गतेसम्म परीक्षा सञ्चालन गरेको थियो । १३ हजार ५९ पदका लागि देशभरका १८ सय १४ केन्द्रमा परीक्षा भएको थियो । आयोगले प्राथमिक तहको लागि ७ हजार ७ सय ८०, निम्नमाध्यमिकको लागि २ हजार ७ सय ९३ र माध्यमिक तहको लागि २ हजार २ सय ६८ पदमा परीक्षा लिएको थियो ।
यसअघि आयोगले २०५२ सालमा लिएको परीक्षाको नतिजा २०६० सालमा प्रकाशन गरेको थियो । नतिजा प्रकाशनमा २०५२ सालको इतिहास भने नदोहोरिने आयोगले दावी गरेको छ ।
