- सोमबार, २१ असोज, २०८१
धनुषा, ३ कात्तिक–गुणस्तरीय स्वास्थ्य सेवा लिन भारत तथा अन्यत्र जानुपर्ने बाध्यता खेप्दै आएका जनकपुरधामका बिरामीलाई अब त्यो समस्या टरेर गएको छ । निजीस्तरमा १० करोड २५ लाख रुपैयाँ लागतमा निर्माण भएको एकसय शैयाको जानकी हेल्थ केयर एन्ड रिसर्च सेन्टर प्रालि नामको सुविधासम्पन्न अस्पताल सञ्चालनमा आएपछि बिरामीलाई बाहिर जानुपर्ने बाध्यता हटेर गएको हो ।
गरिब तथा आर्थिक अवस्था कमजोर रहेका बिरामीका लागि अस्पतालले २० शैया छुट्याएर उपचारमा सहुलियत दिने व्यवस्था मिलाएको अस्पताल प्रशासनले जनाएको छ । पैँतीसजना विशेषज्ञ चिकित्सकसहित १० जना मेडिकल अधिकृत र २० जना कर्मचारीले प्रत्यक्ष सेवा पुर्याइरहेको सो अस्पतालमा हाल आकस्मिक, साधारण प्रसूति, बालरोग, प्याथोलोजी जाँच, भेन्टिलेटर तथा आइसियु सेवा सञ्चालन हुँदै आएको छ ।
थप सेवा विस्तार गर्दै अस्पतालले २५ लाखको लगानीमा छुट्टै आँखा सेवा विभाग सुरु गरेपछि आँखा रोगीलाई समेत सेवा लिन सुविधा भएको उपचार गराउन आएका बिरामी बताउँछन् । अस्पतालले आँखा उपचार गराउन आउने प्रतिबिरामीबाट १२५ रुपैयाँ मात्र शुल्क लिने गरेकाले आर्थिक अवस्था कमजोर रहेका बिरामी बढी आकर्षित हुन थालेको बताइएको छ । रासस
