संसदीय व्यवस्था ध्वस्त भएकोमा बैद्यलाई चिन्ता

तुलसीपुर (दाङ), असोज–संसदीय व्यवस्था ध्वस्त पारी नयाँ जनवादी गणतन्त्रका लागि लडदै आएका नेकपा–माओवादीका अध्यक्ष मोहन वैद्यलाई अहिले संसदीय व्यवस्था ध्वस्त हुन थालेकोमा चिन्ता लाग्न थालेको छ । चार दलिय गठबन्धनले नेपालको संसदीय व्यवस्था ध्वस्त पारेको आरोप लगाउँदै अध्यक्ष बैद्यले नयाँ राजनीतिक सहमति बिना मुलुकको समस्या समाधान हुन नसक्ने बताए ।
दाङको लमहीमा पश्चिम कमाण्डको बैठकपछि बिहिवार आयोजित छलफल कार्यक्रममा वैद्यले यसमा चार दलीय सिन्डिकेट चुकेको पनि बताए । नेपालमा संसदीय व्यवस्था असफल भइसकेको दाबी गर्दै बैद्यले नेकपा– माओवादीसहित ३३ दललाई किनारामा राखेर समस्याको समाधान नगरी जबर्जस्ती गर्न थालेको निर्वाचनले नयाँ संविधान नबन्ने दाबी पनि गरे ।
एक फरक प्रसङ्गमा बैद्यले एकीकृत नेकपा (माओवादी)ले चुनावमा आउँछ भनेर हल्ला फैलाउनु दुस्प्रचार मात्र भएको पनि बताए ।    चार दलीय संयन्त्रले वार्ता भङ्ग गरेको चर्चा गर्दै बैद्यले अब आन्दोलनलाई थप सशक्त र प्रभावकारी बनाएर अगाडि बढाउन आफ्नो पार्टीले देशव्यापीरूपमा छलफलको आयोजना गरेको बताए । निर्वाचन बहिष्कारको कार्यक्रमलाई शान्तिपूर्णरूपमा अगाडि लैजाने पनि उनले जानकारी दिए ।
काठमाण्डु,पूर्वाञ्चलको इटहरीमा छलफल कार्यक्रम सम्पन्न गरिसकेको नेकपा– माओवादीले बिहिवार दाङको लमहीमा थारुवान, सेती–महाकाली, भेरी–कर्णाली, मगरात र अवध राज्य समितिका केन्द्रीय सदस्यको संयुक्त बैठक राखेको थियो ।