काठमाण्डु, २१ असोज – उच्चस्तरीय राजनीतिक समितिले संविधानसभा उम्मेदवारको सुरक्षा गर्न सरकारसँग माग गरेको छ ।
समिति संयोजक एवम् एमाले अध्यक्ष झलनाथ खनालले सोमबार मन्त्रिपरिषद् अध्यक्ष खिलराज रेग्मीलाई भेट गरी उम्मेदवारको सुरक्षामा गम्भीर हुन आग्रह गरेका हुन् ।
उनले एमाले बारा–४ का उम्मेदवार मोहम्मुद आलममाथि गोली हान्ने समूहको पहिचान गरी कानुनी दायरामा ल्याउनसमेत माग गरेका छन् । भेटमा अध्यक्ष रेग्मी र खनालबीच आसन्न संविधानसभा निर्वाचन, उम्मेदवारको सुरक्षालगायत विषयमा छलफल भएको रेग्मीका प्रेस संयोजक राजेन्द्र पाण्डेले बताए ।
जवाफमा रेग्मीले सरकारले घटनामा संलग्नको खोजी भइरहेको र केही दिनभित्रै कानुनी दायरामा ल्याउने दाबी गरेका थिए । उनले निर्वाचन सुरक्षाका लागि सरकारले प्रभावकारी नीति ल्याउने तयारी गरिरहेको बताएका थिए ।