- बिहीबार, ६ वैशाख, २०८१
काठमाण्डु, १४ कात्तिक– विदेशमा रहेका नेपालीहरुले पनि संविधानसभा निर्वाचनमा मताधिकार पाउन माग गर्दै दायर एक रिट निवेदनमा विहिबार सर्वोच्च अदालतले सरकार तथा निर्वाचन आयोगका नाममा कारण देखाउ आदेश जारी गरेको छ ।
न्यायाधीश प्रकाश वस्तीको एकल इजलाशले जारी गरेको सो आदेशमा १५ दिनभित्र लिखित जवाफसहित उपस्थित हुन पनि भनिएको छ । सो रिटमा निवेदकलाई अपूरणीय क्षति हुने नदेखिएकाले अन्तरिम आदेश भने जारी गर्न नपर्ने जनाइएको छ ।
आगामी मङ्सिर ४ गते हुने संविधानसभा निर्वाचनमा समानुपातिक निर्वाचन र सम्भव भए प्रत्यक्ष निर्वाचनमा समेत विदेशमा रहेका मतदातालाई नेपाली दूतावास तथा वाणिज्य दूतावासमा मतदान व्यवस्था मिलाउनका लागि आदेश जारी गर्न सो रिटमा माग गरिएको थियो ।
यसैगरी विदेशमा रहेका मतदाताको अधिकार सुनिश्चित नभएसम्म आयोगका बाँकी काम अघि नबढाउन अन्तरिम आदेश जारी गर्न माग गरिएको थियो । आयोग, प्रधानमन्त्री तथा मन्त्रिपरिषद्को कार्यालय, परराष्ट्र मन्त्रालयलाई विपक्षी बनाई अधिवक्तात्रय मोहन साशशङ्कर, प्रवीन पन्दाक र करुणा थपलियाले सो रिट दायर गरेका थिए । रासस
