
बर्दिवास, ९ कात्तिक–महोत्तरी जिल्लाको मुख्य निर्वाचन अधिकृतको कार्यालयले संविधानसभा निर्वाचनका क्रममा चुनाव प्रचारका कार्यक्रम विद्यालय परिसरमा नगर्न दल र उम्मेदवारलाई सचेत गराएको छ ।
निर्वाचनका लागि जिल्लाका मुख्य निर्वाचन अधिकृत प्रकाश खरेलले विज्ञप्ति प्रकाशित गरेर दल र उम्मेदवारलाई सचेत गराएका हुन । कतिपय निर्वाचन क्षेत्रमा चुनावीसभाका कार्यक्रम विद्यालय परिसरमा आयोजन भएका गुनासो आएको भन्दै मुख्य निर्वाचन अधिकृतको कार्यालयले यो क्रमले निरन्तरता पाइरहे आचारसंहिता उलङ्घनबारे कारबाही चलाइने स्पष्ट पारेको छ । ‘‘निर्वाचन आचारसंहिता उलङ्घन भएको पाइएमा सम्बन्धित उम्मेदवारको उम्मेदवारी रद्द गर्नेसँगै एक लाख रुपैयाँसम्म जरिवाना गर्नसकिने प्रावधानतर्फ सबै दल र उम्मेदवारलाई सचेत गराइन्छ’’ मुख्य निर्वाचन अधिकृत खरेलले जारी गरेको बिज्ञप्तिमा भनिएको छ ।
जिल्ला सदरमुकाम जलेश्वर नगरसहितका ३ नं क्षेत्रमा पर्ने ग्रामीण क्षेत्रका विद्यालय परिसरमा राजनीतिक दलले चुनावीसभा र प्रचारप्रसारका कार्यक्रम सञ्चालन गरेका गुनासो बढेपछि कार्यालयले विज्ञप्ति नै जारी गरेर सचेत गराउनुपरेको बुझिएको छ । पछिल्लो पटक छापा एवम् विद्युतीयसहितका सञ्चारमाध्यममा प्रचारप्रसार पनि निर्वाचन खर्च सीमाको अधीनमा रहेर मर्यादित रुपले गर्न मुख्य निर्वाचन अधिकृत खरेलले आफ्नो विज्ञप्तिमार्फत सचेत गराएका छन ।
चुनावी प्रचारप्रसारका कुरामा समाचार सम्पे्रषण र प्रायोजित सन्देशमा कुनै पनि सञ्चारमाध्यमले कुनै दल र उम्मेदवारलाई काखापाखा गर्न नहुने विज्ञप्तिमा प्रस्ट्याइएको छ । जिल्लाका छ वटै निर्वाचन क्षेत्रमा दल र उम्मेदवारले प्रयोग गरिरहेका सवारीसाधन कानुन र निर्वाचन विधि नियमानुकूल नियमन गरेको नपाइएमा तत्काल कारबाहीको विषय बनाइने मुख्य निर्वाचन अधिकृतको कार्यालयले स्पष्ट पारेको छ । रासस