चुनाव एकसाता पर सार्न सकिन्छः एमाओवादी

काठमाण्डु, २९ भदौ –एकीकृत माओवादी प्रवक्ता अग्नि सापकोटाले मोहन वैद्य नेतृत्वको नेकपा–माओवादी निर्वाचनमा आउन तयार भए निर्वाचन मिति एक साता पर सार्न सकिने बताएका छन् ।
पार्टी केन्द्रीय कार्यालय कोटेश्वर पेरिसडाँडामा शनिबार भएको नियमित पत्रकार भेटघाटमा उनले ४ मंसिरको निर्वाचन बढीमा एक सातासम्मका लागि सार्न सकिने बताएका हुन् । निर्वाचन आयोगको कार्यतालिका प्रभावित नहुने गरी वैद्य माओवादीलाई दल दर्तामा विशेष व्यवस्था गर्न सकिने सापकाटाले बताए । संविधानसभा निर्वाचन नै नचाहाने वैद्य माओवादी निर्वाचनमा सहभागी हुन तयार देखिनुलाई सकारात्मक रुपमा लिनुपर्ने उनको भनाइ छ  ।
उनले दुई पार्टीको शीर्ष तहमा पार्टी एकताबारे गम्भीर छलफल चलिरेहको खुलासासमेत गरे । तर छलफलका क्रममा निर्वाचन सार्ने विषयमा भने कुनै कुराकानी नभएको दाबी उनले गरे । वैद्य माओवादी पार्टी फुटको औचित्य सिद्ध गर्न नसकेपछि निर्वाचन र पार्टी एकताबारे सकारात्मक देखिएको टिप्पणी सापकोटाको छ ।