वैद्यलाई सहमतिमा ल्याउन राष्ट्रपतिको दबाब

काठमाण्डु, २५ भदौ– राष्ट्रपति रामवरण यादवले समय निकै घर्कीसकेकाले निर्वाचन प्रक्रियामा असहमत मोहन वैद्य नेतृत्वको नेकपा–माओवादीलाई तत्काल सहमतिमा ल्याउन मुख्य चार दलका शीर्ष नेतालाई दबाब दिएका छन् ।
उच्चस्तरीय राजनीतिक समितिमा रहेका एकीकृत माओवादी, काँग्रेस, एमाले र मधेसी मोर्चाका शीर्ष नेतालाई सोमबार शीतलनिवास बोलाएर राष्ट्रपतिले वैद्यसमेतको सहभागितामा तोकिएकै मितिमा निर्वाचन सुनिश्चित गर्न दबाब दिएका हुन् । शीतलनिवासबाट बाहिरिने क्रममा सञ्चारकर्मीसँग कुरा गर्दै काँग्रेस सभापति सुशील कोइरालाले राष्ट्रपतिले ४ मंसिरको निर्वाचनका अगाडि रहेका सबै प्रकारका अवरोध तत्काल हटाउन सुझाव दिएको बताए । कोइरालाका अनुसार त्यसका लागि आवश्यक सहयोग गर्नसमेत राष्ट्रपति तयार देखिएका छन् ।

भेटमा आफूहरुले सरकार विघटन र निर्वाचन स्थगन गर्नुपर्ने वैद्य मोर्चाको मागमा लचकता अपनाउन नसकिने जवाफ राष्ट्रपतिलाई दिएको जानकारी दिए । सिंगो देश निर्वाचनमय भएकाले ४ मंसिरमा निर्वाचन गर्नुको विकल्प नरहेको कोइरालाको भनाइ छ । भेटमा नेताहरुले उपेन्द्र यादव नेतृत्वको संघीय लोकतान्त्रिक मोर्चा र अशोक राई नेतृत्वको संघीय समाजवादी पार्टीसँग भएको सहमति र वैद्य पक्षलाई सहमतिमा ल्याउन भइरहेका प्रयासबारे राष्ट्रपतिलाई अवगत गराएका थिए ।