- शुक्रबार, ७ वैशाख, २०८१
धनकुटा, २२ भदौ–धनकुटाको मूलघाट नजिक गएको पहिरोले करिब एक दर्जन घर पुरेको छ । अविरल वर्षासँगै खसेको पहिरोले महाभारत, बुढिमोरङ र भेडेटार गाविसका करिब १३ वटा घर पुरेको छ । घर पुरिएपछि एक सय जना विस्थापित भएका छन् । पहिरोका कारण घन्टे, गर्जुवा र खरानेखोला क्षेत्रका दर्जनभन्दा बढी घर जोखिममा परेका छन् ।
कोसी राजमार्ग पनि पहिरोका कारण अवरुद्ध भएको छ । राजमार्गको करिब तीन किलोमिटर क्षेत्रको दर्जनभन्दा बढी स्थानमा पहिरो खसेको छ । राजमार्ग अवरुद्ध भएपछि दर्जनौं सवारीसाधनका सयौं यात्रु बीचबाटोमै अलपत्र परेका छन् ।
घटनास्थलमा उद्धार कार्य जारी रहेको जिल्ला प्रहरी कार्यालय धनकुटाका प्रहरी उपरीक्षक ईश्वरीप्रसाद चापागार्इंले बताए । ठूलो क्षेत्रमा पहिरो गएको र वर्षा पनि नरोकिएकाले पहिरो पन्छाउन र उद्धारमा कठिनाइ भएको प्रहरीले जनाएको छ ।
