विश्वप्रसिद्ध फुटबलर पेलेले अस्पतालबाटै भने, ‘म ठीक हुँदैछु !’

एजेन्सी– विश्वप्रसिद्ध फुटबल खेलाडी पेले बिरामी परेको खबरबाट उनका प्रशंसकहरु दुःखी भएकै बेला उनले ट्वीट गरेर आफू निको हुँदै गरेको लेखेका छन् ।

ब्राजिलका ख्यातीप्राप्त यी फुटबल खेलाडी मुत्र नलीमा संक्रमण भएपछि साओ पाओलोको एक अस्पतालको विशेष केयर युनिटमा भर्ना भएका थिए ।
ब्राजिलको साओ पाओलोको अल्बर्ट आइन्स्टाइन अस्पतालमा उपचार गरिरहेका ७४ वर्षीय पेलेले ट्वीटमा लेखेका छन्, ‘म ठीक हुँदैछु । अब केही पिर गर्नुपर्दैन, म तपाईंहरु सबैको माया र साथ पाएर हाँसीखुशी नै छु ।’
उनले ट्वीटमा आफ्ना प्रशंसकहरुलाई धन्यवाद पनि दिएका छन् । पेलेले छिटै निको भएर आफ्नो परिवारसँग बिदा मनाउने र नयाँ वर्षको स्वागत गर्ने आशा पनि व्यक्त गरेका छन् ।
पेलेले तीन पटकसम्म विश्वकप जितेको ब्राजिली टिमका खेलाडी हुन् । उनी संलग्न ब्राजिलको टिमले सन् १९५८, १९६२ र १९७० मा विश्व कम जितेको थियो । पत्थरीको शल्यक्रियाका लागि उनी केही दिनअघि आइन्स्टाइन अस्पतालमा भर्ना भएका थिए ।
पेलेले आफ्नो २१ वर्षको खेल जीवनमा १,३६३ खेल खेलेका थिए भने १,२८१ गोल गरेर रेकर्ड राखेका थिए । फिफबाट उनी शताब्दी खेलाडीको उपाधि पाएका छन् ।