- सोमबार, २५ जेठ, २०८३
काठमाण्डू, २५ जेठ– जनमत पार्टीका अध्यक्ष डा. सीके राउतले मधेसकै बलमा सरकार बनाउने तर अधिकार नदिने षड्यन्त्र हुँदै आएको बताएका छन । आज (सोमबार) काठमाण्डूको माइतीघरमा जनमत पार्टीले आयोजना गरेको विरोध प्रदर्शनलाई सम्बोधन गर्दै अध्यक्ष राउतले यस्तो बताएका हुन ।
उनले नेपालमा जुनसुकै शासन व्यवस्था आए पनि मधेसका मागप्रति अनुदार हुने गरेको पनि बताएका छन । अध्यक्ष राउतले मधेसबाट मत लिएर सरकार बनाउने तर मधेसका अधिकारका सवालमा बेवास्ता गर्ने प्रवृत्ति निरन्तर रहेको आरोप समेत लगाएका छन ।
राणा शासनकालमा मधेसमाथि उपनिवेशवादी शासन लादिएको दाबी गर्दै अध्यक्ष राउतले पछिल्ला ७५ वर्षमा कांग्रेस र कम्युनिस्ट दलहरूले पनि मधेसलाई विभिन्न रूपमा ठग्दै आएको समेत बताएका छन ।
वि.सं.२००७–००८ सालपछि कांग्रेस र कम्युनिस्टहरूले सत्ताको नेतृत्व गरे पनि आजसम्म मधेसीलाई पूर्ण अधिकार नदिएको उनको भनाइ छ। उनका अनुसार नागरिकता, सुकुम्बासी व्यवस्थापन र स्वायत्तता लगायतका मधेसका मुख्य मागहरू अझै पूरा हुन सकेका छैनन् । उनले सशस्त्र द्वन्द्वका क्रममा पनि मधेसी समुदाय अपेक्षित उपलब्धिबाट वञ्चित भएको दाबी गर्दै माओवादी नेतृत्वको आन्दोलनबाट समेत मधेसीहरू ठगिएको उल्लेख गरे ।
मधेसको राजनीतिक, सामाजिक र संवैधानिक अधिकार सुनिश्चित नभएसम्म विभेद अन्त्य नहुने पनि उनले बताए । राउतले भने, ‘मधेसलाई राणाहरूले पनि ठगे, उपनिवेश शासन नै लादे, कांग्रेस कम्युनिस्टहरूले पनि विगत ७५ वर्षदेखि ठग्दै आएको हामीकहाँ प्रमाण नै छ ।
२००७–००८ सालमा कांग्रेसहरूको सत्ता आयो तर अहिलेसम्म कुनै अधिकार नदिने, नागरिकता नदिने, सुकुमबासीहरूलाई व्यवस्थापन नगर्ने, स्वायत्तता नदिने गरी विभिन्न रूपले ठगी गर्दै आएको छ ।
मत चाहिँ मधेसबाट लिने, सरकार चाहिँ मधेसबाट नै बनाउने तर जहिले पनि अधिकार चाहिँ नदिने षड्यन्त्र हुँदै आएको छ। त्यति मात्रै होइन माओवादी आन्दोलन हुँदा पनि मधेसीहरू ठगिएको हामीकहाँ प्रमाण छ।’
