- आइतबार, १४ असार, २०८३
काठमाण्डू ६ साउन– कांग्रेस महामन्त्री विश्वप्रकाश शर्माले बीपी कोइरालालाई बुझ्न नसकेका कारण नेपालको राजसंस्था अहिले नागार्जुनको जंगलमा थन्किएको दाबी गरेका छन ।
आज (मंगलबार) ४३ औं बीपी कोइराला स्मृति दिवसको अवसरमा बीपी स्मृति अस्पताल, बसुन्धरामा आयोजित ‘देश विकास र देशवासीको उन्नतिको आधार स् बीपी विचार’ विषयक विचार गोष्ठीलाई सम्बोधन गर्दै उनले यस्तो बताएका हुन । शर्माले ‘राजा र मेरो गर्धन जोडिएको छ’ भन्ने बीपीको विचारलाई राजसंस्थाले अपव्याख्या गरेको समेत बताए ।
त्यसको परिणाम नेपालमा राजसंस्थाको समेत अन्त भएको उनको तर्क छ । उनले बीपी कोइरालालाई बुझ्ने सवालमा नेपालमा धेरै नै कमजोरी भएको उल्लेख गरे । उनले भने, ‘बीपी कोइरालालाई सही मानेमा जति चाँडो जति सही मानेमा बुझ्न सकिन्छ, त्यति चाँडो देशको उन्नतिलाई सहज बनाउन सकिन्छ ।
बीपी कोइरालालाई बुझ्ने सवालमा, बीपी कोइरालालाई चिन्ने सवालमा, विपी कोईरालालाई आत्मसात गर्ने सवालमा नेपालको भिन्न–भिन्न शक्तिहरूबाट कमजोरी भएको छ, ‘हामीबाट भएको एउटा कमजोरी छ, नेपालको कम्युनिष्ट आन्दोलनले बीपी कोइरालालाई बुझ्ने सवालमा अर्को कमजोरी छ ।
राजसंस्थाले, राजाहरूले गर्ने कमजोरीको अर्को पाटो छ ।’ नेपाली कांग्रेसले पनि बीपीलाई उचित ढंगले बुझ्न नसकेको र नेपालका कम्युनिष्ट पार्टी र राजसंस्थाबाट पनि बीपीलाई बुझ्ने सवालमा कमजोरी रहेको उनको भनाइ छ।
