- बुधबार, ४ असार, २०८२
काठमाण्डु, २० भदौ– नेकपा एमालेका महासचिव शंकर पोख्रेलले पूर्व प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डको असंसदीय र अराजनीतिक अभिव्यक्तिले तनाव सिर्जना गरेको आरोप लगाएका छन । आज बिहिबार सुर्खेत विमानस्थलमा पत्रकारहरूसँग कुरा गर्दै पोख्रेलले यस्तो बताएका हुन ।
उनले सत्ताबाहिर पुगेपछि प्रचण्डले देशलाई श्रीलंका र बङ्गलादेशको बाटोमा डोर्याउने अलोकतान्त्रिक अभिव्यक्ति दिएको भन्दै आपत्ति व्यक्त गरेका हुन ।
उनले भने, ‘सत्ताबाट बाहिरिएपछि माओवादी अध्यक्ष प्रचण्डबाट अतिवादी दृष्टिकोणबाट अनेक खाले अस्थिरता मच्चाउने काम भइरहेको छ, ‘प्रतिपक्ष दलका नेताको असंसदीय र अराजनीतिक अभिव्यक्ति दिंदा मुलुकको राजनीतिमा एक खालको तनाव सिर्जना भएको छ ।’
उनले प्रतिपक्षको भूमिकामा रहेका माओवादी अध्यक्ष प्रचण्डले संवेदनशीलता र संसदीय मर्यादाको ख्याल नगरेको आरोप पनि लगाएका छन । उनले भने, ‘प्रतिपक्षीले श्रीलंका र बङ्गलादेशको उदाहरण दिंदै त्यो दिशातर्फ डोर्याउन खोज्नु अत्यन्त गैरजिम्मेवार कुरा हो, ‘यसरी अभिव्यक्ति दिंदै हिंड्नु लोकतान्त्रिक हुन सक्दैन, प्रतिपक्षीले लोकतान्त्रिक मूल्यमान्यतामा ध्यान दिनु जरुरी छ ।’
महासचिव पोख्रेलले आफ्नो आशय देशमा दुई दलीय व्यवस्था नभई फरक विचारका दुई ठुला दल भए पुग्छ भन्ने रहेको पनि बताएका छन । तर, कांग्रेस एमालेले दुई दलीय व्यवस्थाको वकालत भने नगरेको बताए । ‘मैले दुई दलीय प्रणालीको कुरा गरेको छैन, मुलुकको स्थायित्व र विकासका लागि दुई दल भए पुग्छ भनेको हो ।
अमेरिकामा सयौं वर्षदेखि दुई दलबीच प्रतिस्पर्धा भइरहेको छ । संसद्को जननी बेलायतमा अरू दल खोल्न नपाइने हो र रु तर, दुई दलबीच नै प्रतिस्पर्धा चलिरहेकै छ’ उनले भने ।
